Бугарската полиција во нова акција во неделата откри минибус со кој биле превезувани 43 мигранти во близина на градот Ихтиман, 55 километри југоисточно од главниот град Софија, пренесуваат бугарските медиуми.
Окружниот обвинител на Софија, Наталија Николова, изјави дека 10 од мигрантите се деца и соопшти дека сите се наоѓаат во добра здравствена состојба. Минатата недела, полицијата пронајде 18 мртви тела на мигранти во напуштен камион во село во близина на главниот град Софија, а според наодите од истрагата сите починале од задушување.
Државните органи за овој случај информираа дека се уапсени повеќе лица, меѓу кои и организаторот на групата. Открија и дека на мигрантите за илегален транспорт низ земјата од бугарско-турската граница до бугарско-српската граница им биле наплаќани од 6-7 илјади евра.