Македонскиот тенисер Калин Ивановски не го издржа напорното темпо на мечеви во Монастир, Тунис и денеска го предаде мечот во финалето. Тоа беше втор дуел за него денеска откако утринава играше и полуфинале.
Младиот 18-годишен тенисер ја бараше првата титула во 2023 година откако лани подигна три трофеи. Денеска тој го предаде мечот во финалето против Холанѓанецот Рајан Нијбоер, откако го загуби првиот сет со 2-6, а во вториот имаше негатива од 0-3. Ивановски утринава го играше полуфиналето со Италијанецот Фабрицио Андалоро, што го доби откако противникот се повлече при резултат 6-1 и 2-0. Мора да се истакне дека нашиот тенисер вчера исто така играше два меча, од осминафиналето и четвртфиналето, што ги доби во три сета. Очигледно заморот си го направи своето, па Ивановски мораше да го предаде финалето.
Ова е второ загубено финале за 18-годишникот во Монастир годинава. Ивановски моментално се наоѓа на 504.место во светот на АТП ранг-листата.