Македонската ракометна репрезентација има максимален ефект по двете почетни кола во квалификациите за ЕП во 2024 година. По триумфот над Луксембург во Скопје, избраниците на селекторот Кирил Лазаров денеска славеа и на гостувањето кај Турција со убедливи 27-36.
Македонија влезе на натпреварот во Ван максимално ангажирано и мотивирано, па можеби и го реши победникот уште по првите 12-13 минути кога имаше водство од 0-9. Турците немаа решение за нашата одбрана, но и за нападот, па пред крајот на првиот дел поведовме и со 10 разлика. На полувремето резултатот гласеше 8-17.
Во вториот дел продолжи доминацијата на Македонија. Турција единствено два пати успеа да намали на негатива од шест голови, по што нашите ракометари веднаш враќаа и два пати имаа двоцифрена предност. Конечниот резултат беше 27-36.
Филип Талески со седум голови беше најефикасен во нашиот табор, Дејан Манасков имаше пет, додека Томислав Јагуриновски имаше четири. Никола Митревски имаше седум интервенции на голот, додека Мартин Томовски три. Кај Турција најмногу се истакна Ерај Каракоч со седум голови.
Македонија го дели првото место на табелата во групата 1 заедно со Португалија, која исто така има максимални две победи. Следниот натпревар во квалификациите го играме токму против овој ривал и тоа во Скопје на 8.март идната година.