Согласно информациите од Општина Центар, конкретниот урбанистички план за опфатот на поранешната фабрика Треска е донесен во 2012 година и предвидува изградба на згради со височина од најмногу приземје со 5 ката и поткровје, а во дел и приземје со 4 ката и поткровје, во класична блоковска распореденост.
Токму ваков е и планот на самите сопствениците на приватните парцели на оваа локација, меѓутоа во јавноста циркулираа голем број информации, голем дел од нив и невистини, во врска со можниот изглед на планираниот комплекс, односно дека просторот таму ќе се бетонира и ќе има облакодери.
Всушност се работи за максимална висина која нема да надмине вкупно 16 метри, што е сосема спротивно на досегашните шпекулации во јавноста.
Во рамки на конкурсот спроведен од претходната локална самоуправа на Центар, во јавноста беа презентирани идејни решенија коишто се надвор од урбанистичките регулативи и параметрите кои ги дозволува важечкиот ДУП. Истите решенија веќе се објавени во јавноста на веб-страницата на Општина Центар, а сè уште се достапни на линкот: https://marh.mk/izvestaj/
Наведено е дека прворангираниот концепт од идејните решенија е оформен од пет полуотворени станбени блокови со комбинирана катност од приземје + 4 ката, но и до приземје + 8 ката, што е 3 ката над дозволената висина согласно актуелниот ДУП.
Второрангираното решение предвидува станбени блокови со приземје + 6 ката и станбени кули со 17 ката, додека треторангираното конкурсно решение предвидува вертикален елемент кула од 71 метар со намена хотел.
Урбанистички можеби висината не е единствениот параметар кој се гледа, но сепак понудените конкурсните решенија излегуваат од важечката регулатива, наспроти планот на сопствениците на градежните парцели, кои ветуваат ниска градба, со многу зеленило и јавни површини.
Она што е реалната слика, согласно најавите од сопствениците на парцелите на поранешната фабрика Треска, е дека е предвидена изградба на комплекс од вкупно 6 блока, при што најмалиот е со вкупна површина од околу 3900 м2, додека најголемиот 8920 м2, и кај сите 6 блокови се предвидува голема површина на зеленило како партерно уредување.
Важно е да се потенцира дека актуелниот ДУП од 2012 година, на оваа површина предвидува само 5% зеленило, меѓутоа инвеститорите тврдат дека предвидуваат и повеќе од законскиот минимум од 20%, или вкупно 8.200 м2 зелена површина како партерно уредување во рамки на блоковите. Дополнително предвидена е и изградба на јавен парк со вкупна површина од 9.474 м2.
На овој начин, вкупното зеленило предвидено за просторот во Треска достигнува близу 18.000 м2, што е значително над минимумот кој го наложува новиот Закон за урбано зеленило.
Каков ќе биде исходот и што точно ќе биде изградено на оваа локација, јавноста ќе дознае наскоро. Но, оваа локација, која сега е мини депонија во сред Центар, мора да се реши и урбанизира.
Впрочем, урбанизација и конечно решение за „Треска“ бараат и жителите од околните згради затоа што она што е останато од некогашната фабрика за мебел е потенцијален извор на инфекции.