Стопена конструкција, веќе непостоечки делови и остра миризба остави пожарот кој започнал најпрво во возилото „Ауди“.
Од пламените јазици „настрадаа“ уште неколку возила.
Ауди-то овде го паркирала сопругата на поранешниот скопски градоначалник, Петре Шилегов.
Пламените јазици ги дофатиле и другите три возила во непосредна близина.
Повредени и жртви во пожарот нема, а материјалната штета можела да биде и многу поголема ако огнот се префрлел на околните куќи.
„Беше некаде околу три часот кога слушнавме како пукаат гумите на опожарените возила. Станува збор за возилата на сопругата и на соседот. Веднаш повикавме Пожарна и среќа што немаше поголема штета и ниту еден објект не беше зафатен. Полицијата беше на лице место и беше направен увид, па ќе ги почекаме официјалните информации. Јас засега немам никакви индиции, ниту пак сомнежи дека пожарот можеби е подметнат од некого“ за Телма вели поранешниот градоначалник, Петре Шилегов.
Од Министерството за внатрешни работи информираат дека увидните екипи веќе завршиле со своите активности.
„На 9 март во 3 часот и 20 минути било пријавено дека на улица „Петре Пирузе“ во Скопје настанал пожар во патничко моторно возило „Ауди“ со скопски регистарски ознаки, сопственост на правно лице, а паркирано од Ј.Ш. Од пожарот зафатени биле и патнички моторни возила „Пасат“, „Матиз“ и „Нисан“ со скопски регистарски ознаки, сите сопственост на Д.М. (53). Се врши увид и се работи на расчистување на случајот“ соопштуваат од Министерството за внатрешни работи.
Материјали за вештачење се собрани и во истрагата ќе се трага по одговорите – дали пожарот бил намерно подметнат или пак настанал од други причини.
Петар Догов