Специјалната вонредна седница на Генералното собрание на Обединетите нации посветено на Украина почна со минута молчење. Се дебатира дали да се осуди руската инвазија врз нејзиниот сосед. Претседателот на Собранието Абдула Шахид повика на итен прекин на огнот и на дијалог. Рускиот амбасадор во Обединетите нации, Василиј Небензја, соопшти дека Москва не планира да ја окупира Украина и дека руските сили не се закана за украинските цивили. Тој соопшти дека САД протеруваат 12 руски дипломати во Мисијата на Обединетите нации, кои треба да си заминат до 7 март. Кинескиот амбасадор Чанг Јун посочи дека студената војна одамна е завршена и дека со враќањето на таквата политика –сите ќе изгубат. Кина гласаше воздржано при изјаснувањето на Советот за безбедност на Обединетите нации за Резолуцијата за осуда на руската агресија.
