Новиот Закон за дивоградби повторно заглавен во собраниска процедура. Министерот за транспорт и врски, Благој Бочварски при денешниот увид во градежните работи на брана на река Отиња во Штип потврди дека Законот е доставен во Собрание и сега на потег се пратениците. Законот за кој јавноста имаше остри реакции и побара дебата, во два наврати се коригираше, беа вклучени експерти и еснафските здруженија, ги помина сите постапки. Министерот Бочварски сега очекува да го повикаат и да дебатираат за оваа законско решение, кое го чекаат граѓаните, но и државните и локални институции за легализација на патишта, училишта, далноводи.
Претседателот на собраниската Комисија за транспорт и врски, Владо Мисајловски за Телма потврди дека Законот пристигнал до нивната комисија, но пратеничката од ДОМ, Маја Морачанин побарала Надзорна расправа за Законот за дивоградби. Мисајловски вели дека иницијативата ја чека од Морачанин, по што ќе почне посебната процедура и ќе бидат повикани повторно и експерти, здруженија за да дадат свое мислење. Тоа значи дека овој закон наскоро и нема да биде донесен. Побаравме одговори од пратеничката Морачанин, кога ќе ја достави иницијативата и зошто побарала надзорна расправа, во телефонска порака одговори дека денеска не може да одговори на прашањата поради службени обврски.
Викторија Димитрова Јованова
