И новата 2022 година ќе биде олимписка, шест месеци по Летната олимпијада во Токио на програмата се зимските Игри што ќе се одржат во Пекинг и тоа во периодот од четврти до 20 февруари.
Кинеската престолнина ќе биде првата која имала чест да биде домаќин на најдобрите спортисти на Зимските и Летните олимписки игри.
Откако Пекинг во 2008 беше организатор на летните игри во февруари го организира и најголемото зимско натпреварување, а по Сапоро, Нагано и Пјонгчанг, далечниот исток по четврти пат во историјата ќе биде домаќин на Зимските игри.
Оваа година натпреварувачите од деведесетина земји ќе се борат за медали во 109 дисциплини во 15 спорта и за разлика од последните Игри во Јужна Кореа во програмата е надополнета со нови седум натпреварувања што е рекорд во историјата на олимпијадите.
Буџетот за организација на Игрите изнесува четири милијарди евра што е десет пати помалку од пред 14 години, но овој пат организаторот инвестираше помалку во изградбата на инфраструктурата бидејќи ќе се искористат голем број на објекти што се користеа во 2008-та.
Како и пред шест месеци натпреварувањето ќе се организира под строги мерки за превенција од ширењето на корона вирусот, но за разлика од Токио овој пат ќе биде дозволено присуство на гледачи, но само за државјаните на земјата домаќин.
24-тите Зимски олимписки игри ќе се одржат од 4 до 20 февруари, а Македонија според последните информации ќе има натпреварувачи во алпските и нордиските дисциплини.