Сојузот на спортови на Скопје и Градот Скопје денеска ги наградија најуспешните спортисти за 2021 година. Главниот град изминатава година имаше многу претставници на меѓународните борилишта, кои забележаа фантастични резултати.
Дејан Георгиевски, кој освои сребрен медал на Олимписките игри во Токио во таекводно, очекувано беше меѓу наградените, како и неговиот тренер Борче Костовски. Покрај Георгиевски признанија кај сениорите во машка и женска конкуренција добија и каратистите на Макпетрол, Петар и Симона Заборски, потоа борачот Могамедгаџи Нуров, кикбоксерите Викторија Варадинова и Бобан Илиoски, пливачот Филип Дерковски, како и атлетичарките Дрита Исљами и Адријана поп Арсова.
Во младинска категорија помеѓу десетте добитници доминираат каратистите. Стефан Стојановиќ од Макпетрол, потоа Столе Смилковски, Антонија Белазелкоска и Мила Младеновска. Со признанија се закитија и Мери Акиевска, Марија Спировска, Миа Тодоровска, тенисерите Калин Ивановски и Александар Симева и пливачката Миа Еминова Блажевска.
Најуспешен странски спортист е ракометарот на Вардар, Анте Гаџа, а признанија добија и пливачот Андреј Стојановски и планинарот Стоилко Стоицев во категоријата најуспешни спортисти со попреченост.
