41 евро за мегават час струја е цената која што ја донесе Владата на затворената седница а која денеска на тендерот, пети по ред, ЕСМ му ја понуди на универзалниот снабдувач ЕВН Хоум. Државните електрани доставија понуда на двата тендери кои се однесуваат на периодот јануари – јуни 2022 година со што ќе ја покријат комплетната побарувачка на струја за домаќинствата и малите потрошувачи. На тендерите конкурираше само ЕСМ.
АД ЕСМ и на двата тендери (за 60% и 40% од вкупните планирани потреби) преку електронски аукции му понуди на ЕВН Хоум како Универзален Снабдувач купопродажна цена на електрична енергија од 41 евро за мегаватчас. Добиената купопродажна цена е за 13,6 % повисока од претходната која беше добиена на последниот тендер на Универзалниот снабдувач за набавка на електрична енергија за периодот Јули-Декември 2021 година, кога АД ЕСМ понуди купопродажна цена на електрична енергија од 36,1 евро за мегаватчас, соопштуваат од ЕСМ.
Висината на тендерот засега не се открива, но според проценките на ЕСМ за покривање на потребите на ЕВН Хоум во текот на 2022 година ќе биде потребно да испорачаат 3.400 гигавт часови струја или 1.700 за првото полугодие, па затоа останува отворено прашањето дали државните елекрани ги имаат потребните капацитети.
А колку поскапа цена на струја ќе плаќаат домаќинствата и малите потрошувачи допрва ќе се утврдува. Од Владата лицитираат со бројки и најавуваат дека нема да биде поголема од 10 отсто. Сепак Регулаторната комисија е таа што ќе пресече и ќе ја оформи цената на ЕВН Хоум за домаќинствата и малите потрошувачи.
Претседателот на регулаторната комисија, Марко Бислимовски, изјави дека допрва ќе се прават пресметките а при формирањето на цената ќе се обидат да ги намалат маржите и профитот на комапниите во корист на граѓаните.
Бислимовски соопшти дека барање за поскапување на струјата има доставено само од Електродистрибуција и очекува тоа да го страт и ЕВН Хоум и МЕПСО.
Од Регулаторна најавија дека повторно ќе бараат да се субвенционираат ранливите категории на потрошувачи.
Огнен Чанчаревиќ