Внатре-партиските избори во СДСМ и Конгресот во ВМРО ДПМНЕ не се партиски настани, туку од нив зависи и како државата ќе се позиционира во следниот период, укажуваат аналитичарите. Со оглед на тоа што ново-избраниот претседател на СДСМ ќе биде и мандатар на новата влада, а мнозинството е тенко и опозицијата се обидува да ја сврти ситуацијата во своја корист, резултатот утревечер ќе одреди и како ќе се справиме со економската, енергетската и егзистенцијалната криза, а можеби ќе има влијание и на почетокот на преговорите со ЕУ. Промени, велат, особено во владејачката партија, мора да има.
Во СДСМ има повеќе кандидати, а во ВМРО ДПМНЕ засега е само еден, но Кордалов потсетува дека, ова само по себе не е доказ за демократија или нејзино отсуство во партиските редови.
За него е најдобро да има постојана промена на генерации, на раководствата и на политиките кон граѓаните и целните групи. Фокусот, вели, мора да се тргне од строго партиското гледиште кон тоа, што партиите им нудат на граѓаните, дали ги решаваат новините проблеми и ја водат државата кон подобро.
Смета и дека, без разлика на исходот од овие партиски избори, следната година не` очекуваат интересни политички моменти. Работите, вели, мора да се вратат во вистинскиот колосек, а тоа е, партиите да се плашат од граѓаните и нивните одлуки за тоа, кој ќе ја освои или задржи власта, а не обратно. Граѓаните се тие кои треба слободно да одлучуваат, кој владее, колку ќе владее и дали повторно ќе го добие мандатот или, пак, ќе биде даден на некој друг.
Далиборка Демјанска Цветановска