Нема повеќе непоразени во ракометната Суперлига. Еурофарм Пелистер 2 направи голема сензација и го совлада актуелниот шампион и лидер на табелата Вардар со минимални 27-26.
Очигледно поразите во Лигата на шампиони оставија белег кај „црвено-црните“, а особено овој последниот од Кил. Еурофарм Пелистер изненадувачки го контролираше натпреварот од почеток до самиот крај и заслужено се радуваше на победата. Момците на тренерот Веселин Вујовиќ не личеа на себе, а мотивираните битолчани знаеја како да казнат. Домашниот тим имаше највисоки +5 во финишот на првото полувреме, но Вардар даде два гола на крај и на паузата резултатот гласеше 14-11.
Во последните десетина минути од средбата шампионот го засили темпото и дојде до израмнување на резултатот (25-25). Сепак, скопјани одиграа брзоплето во финишот по што Еурофарм Пелистер 2 зголеми на 27-25, а во последната секунда Стојанче Стоилов само го постави конечниот резултат 27-26.
Павле Атанасијевиќ со шест голови најмногу се истакна кај битолскиот состав, додека кај Вардар Гоце Георгиевски и Жереми Тото со по шест голови беа најефикасни.
