Во својата изјава пред суд поранешниот министер за транспорт и врски Миле Јанакиески тврди дека не го сторил делото за кое е подигнато обвинението во предметот Топлик, односно продажбата на земјиштето за Сончев град кај Сопиште, известува од Кривичниот суд во Скопје, Билјана Николовска, новинарка на Телма.
-Одговорно тврдам дека не сум влијаел во работењето на комисијата, не сум барал да се објави огласот, а уште помалку како што се тврди во обвинението сум барал да се објави иако сум знаел дека има недостаток во објавата. Ниту со членовите на оваа комисија, ниту пак со другите сум имал контакт и секогаш сум ја запазувал хиррархиската поставеност во Министерството, рече пред судот Јанакиески.
Според обвинението, Јанакиески ја сменил комисијата која му укажала на 3. април 2007-ма, дека не може да се продава земјиштето поради фактички и правни проблеми.
Наредниот ден од страна на Јанакиески била формирана друга комисија, со други членови кои сега се обвинети заедно со поранешниот министер.
Сите се гонат за злоупотреба на службената положба поради што буџетот и граѓаните се оштетени за милион евра.
Јанакиески на денешното рочиште рече дека долго чекал на оваа одбрана и многу и сериозно се подготвувал. Ова го кажа откако судијата му посочи дека не треба да ги анализира доказите и сведоците во својот исказ.
Поради посочените проблеми од сменетата комисија, проектот Сончев град никогаш не беше реализиран.