Фудбалскиот клуб Њукасл од денеска има нов сопственик, а тоа е принцот на Саудиска Арабија, Мохамед бин Салман, преку својот инвестициски фонд. Премиерлигата ја одобри продажбата на клубот, која првично започна пред 18 месеци.
Њукасл станува клуб со најбогат сопственик во светот, бидејќи „Паблик Инвестменд фонд“, кој е предводен од државата Саудиска Арабија има проценето богатство од преку 300 милијарди фунти. Овој фонд ги купи акциите на „црно-белите“ од досегашниот сопственик Мајк Ешли за 300 милиони фунти.
Премиерлигата излезе со официјално соопштение и ја одобри зделката за продажба на клубот на саудискиот инвеститор. Лигата и новите сопственици на Њукасл мораа да потпишат договори дека Саудиска Арабија како држава нема да меша во работата на клубот и Премиерлигата.
Продажбата на клубот траеше повеќе од 18 месеци и тоа поради тв-правата за емитување на Премиерлигата во Саудиска Арабија. Оваа држава го забрани емитувањето на телевизијата „БеИН Спортс“, која ги има правата за Премиерлигата во Азија, поради спорот со државата Катар, која е сопственик на телевизијата. Откако овие проблеми беа решени, принцот Мохамед бин Салман доби дозвола да го купи Њукасл.
