Трета доза на вакцина, да или не. Ова е прашањето кое се почество се поставува во јавноста и за кое се дискутираат здравствените лица. Колку трае имунитетот од вакцината, кој е идеалниот временски период за аплицирање на трета доза и дали да се користи истата вакцина како и прертходните две се клучните точки кои ги анализираат имунолозите во светот.
Микробиологот доктор Никола Пановски, е на ставот дека трета доза треба да се одобри за да се овозможи подобра заштита на населението, пред се здравствениот персонал и критичните групи.
Доктор Пановски е на ставот дека коктел од вакцини не треба да се прави и треба да се прими од истиот производител како и претходните две освен кога станува збор за вакцините на кинеските производители
Министерот за здравство Венко Филипче е на ставот дека вакцината против коронавирусот може да стане сезонска и трета доза да биде неопходна. Здравствените власти и анализираат студиите и искуствата од повеќе држави во светот и се разгледува можноста дали третата доза да биде од ист производител и по кој временски приод од ревакцинацијата треба да се прими. Засега во Македонија трета доза на вакцина се дава само кај пацинетите со трансплантација и оние на дијализа.
Во регионот засега Србија е единствената држава каде што по препорака на Националниот комитет за имунизација веќе се аплицираа третата доза на вакцина а досега се вакцинирани 120 илјади граѓани. Српските власти размислуваат околу воведување на задолжителна вакцинација за неколку сектори и професии како образованието, војската, полицијата и државнат администрација.
Во Хрватска пак во план е да се анализира количината на антитела кај граѓаните, претежно стари лица, кои први примија вакцина во декември минатата пред да се донесе препорака дали да се воведе трета доза или не. Според хрватските имунолози, девет месеци по ревакцинацијата или прележувањето на вирусот бројот на антитела е преполовен и тогаш треба да се прими третата доза.
Европската агенција за лекови (ЕМА) повеќе пати истакна дека се потребни уште податоци пред одобрувањето на дополнителни дози вакцина, но осум земји членки препорачаа „бустер“ доза а тоа се Австрија, Белгија, Франција, Унгарија, Лихтенштајн, Литванија, Луксембург и Словенија додека Германија планира да ја одобри наесен.
Во САД пак вакцинирање со трета доза ќе почне од средината на идниот месец откако Агенцијата за храна и лекови ја одобри целоната употреба на вакцината „Фајзер Бионтек“ а препорачаниот временски период е шест месеци по примањето на втората доза.
Во Израел пак досега 1,2 милиони граѓани на возраст од над 50 години примија трета доза на вакцина.
Огнен Чанчаревиќ