Дијалогот со Русија мора да се одржува и покрај несогласувањата со Москва, изјави германската канцеларка Ангела Меркел по пристигнувањето во руската престолнина.
– Германија останува еден од главните трговски и економски партнери на Русија во Европа и светот, истакна рускиот претседател Владимир Путин пред почетокот на разговорите со германската канцеларка Ангела Меркел во Кремљ.
– Би сакал да истакнам дека Германија останува еден од нашите главни партнери, и во Европа и во светот воопшто. Особено, благодарение на вашите напори во последните 16 години како федерален канцелар. Германија е нашиот втор по големина трговски и економски партнер по Кина. И покрај фактот дека имавме многу сериозна рецесија во 2020 година, сега има речиси двојно зголемување на трговската размена во првите шест месеци, рече Путин.
Шефот на Кремљ, исто така, ја истакна работата на руско-германските билатерални механизми, групи и форуми, вклучително и одржување на Годината на Германија во Русија, поврзана со економскиот развој.
Рускиот лидер е уверен дека посетата на Меркел на Русија ќе биде не само збогување како канцелар, туку и исполнета со сериозни, деловни содржини. Пред разговорите во Кремљ, рускиот лидер и подари на Меркел букет цвеќе.
– Сега се одвива Годината на Германија во Русија, година на економски развој. Ние сме во постојан контакт по телефон. Имаме многу прашања за кои е потребна дискусија во четири очи, па сигурен сум дека ова нема да биде само проштална посета, поврзана со вашата одлука повеќе да не се кандидирате за федерален канцелар, туку и посета исполнета со сериозна, деловна содржина, рече Путин, обраќајќи се до германската канцеларка.
Како што претходно објави прес -службата на Кремљ, лидерите на Русија и Германија планираат да разговараат за состојбата и перспективите за развој на билатералната соработка во различни области, како и за решавање на голем број актуелни меѓународни и регионални прашања.
Пред почетокот на разговорите со Путин, Меркел положи венец на Могилата на незнајниот војник, воен споменик посветен на паднатите советски војници за време на Втората светска војна (1941-1945). Сместен е крај ѕидините на Кремљ во Александровската градина во Москва.