Додека огнената стихија која беснееше надвор од контрола на вториот грчки остров по големина Евија, полека стивнува, првичните информации навестуваат страотна материјална штета од невидени размери.
Според информативниот систем за глобални шумски пожари на Европската Унија, повеќе од 49 000 хектари шума биле уништени на Евија, што е убедливо најмногу од сите пожари кои минатите денови беснеа во Грција.
Речиси 900-тини пожарникари и над 200 возила се бореа против огнот во северниот дел од Евиа, каде пожарите започнаа да се шират од 3-ти Август. Меѓу нив беа и екипи од Украина, Романија, Србија, Словачка и Полска , дел од огромниот меѓународен одговор на грчкиот повик за помош. Тие беа поддржани и од воздух од 14 хеликоптери.
Огромниот пожар се ширеше во област каде селата се испреплетени со густата борова шума. Непристапниот терен и густиот чад кој ги спречуваше летовите на хеликоптерите, за дел од локалните жители и волонтерите значи дека мораат самите да се борат против огнот, во обид да ја заштитат шумата, од која многумина ја обезбедуваат егзистенцијата.
Таков е случајот и со грчкото село Каматриадес, сместено во густата шума на врвот на едно брдо на островот, каде локалните жители борбата ја водеа и без вистинските алатки за гаснење на огнот. Наместо тоа користеа вода која самите ја пренесуваа до опожарените места, со гранки од дрвјата се обидуваат да ги елиминираат жариштата која се појавуваа а со моторни пили сечеа дрвја кои беа на патот на огнот за да го спречат неговото ширење.
“Немаме помош од никого, како што може да видите, ниту противпожарни возила, ниту авиони, ништо. Сите ние кои сме тука сме доброволци, некои работиме во шумата, каде или сечеме дрвја или ловиме. Не добиваме ништо, никаква помош” – изјави Костас Колуоритис, од селото Каматриадес.
“Повеќето од нас, сме фармери. Работиме со шумата, имаме производи од шумата, како дрво за огрев и слично. Значи сега имаме големо намалување на приходите” – додава негов сожител.
Уште неколку поголеми шумски пожари горат во земјата, додека најтешкиот е лоциран во регионот на јужен Пелопонез, од каде вчера беше спроведена нова евакуација на локалното население. Во тек е и кривична истрага за појавувањето на пожарите, при што се проверува и можната криминална поврзаност. Неколку лица осомничени за подметнување на пожарите веќе се уапсени од полицијата.
Никола Илиевски