Измените на Законот за животна средина со кои се предвидува повисока еколошка такса за нафтените деривати одат на усвојување во Собранието, одлучи владата на вонредна седница.
Се предвидува повисока еколошка такса, 3,1 денар за безоловниот бензин и 3,5 денари за останатите горива.
Ова според Владата се прави за заштита на животната средина.
За разлика од овој потег, Владата оди со намалување на ДДВ за струјата, од 18 на пет отсто.
Новата цена на струјата ќе се знае следната недела, а ќе зависи од од тоа по која цена ЕСМ ќе ја продаде струјата на ЕВН на утрешниот тендер.
Според неофицијалните информации на Телма, цената на ЕСМ ќе изнесува околу 36 евра за мегават час, што е нешто повисока од минатата година кога изнесуваше 33,8 евра за мегават час.
Со ова, доколку има зголемување на цената на струјата тоа најверојатно ќе биде незначително.
Еколошката такса е наш одговор за грижата за животната средина и на повикот на граѓаните да преземеме мерки во однос на ова важно прашање, и затоа сите пари прибрани од оваа такса ќе одат во Еколошкиот фонд кој ќе ја помогне праведната транзиција од фосилните кон енергенсите од обновливи извори на енергија, истакна премиерот Заев во интервју за Топ Тема на Телма.