Владата размислува за воведување на еколошка такса за горивата и намалување на ДДВ-то за електричната енергија од 18 на 5 % – потврди министерот за финансии Фатмир Бесими. Не одговори дали тоа е влезено во ребалансот на буџетот, како што обвинува опозицијата. Но, кажа дека одлука ќе има до крајот на месецов, по што законските измени ќе одат во Собрание. ВМРО-ДПМНЕ тврди дека се воведува нов данок, кој треба да почне да важи од 1 јули, со кој цената на дизелот треба да се зголеми за 4 денари и со тоа да се соберат 27 милиони евра во буџетот.
Не се работи за зголемување на акцизи туку се работи за еколошки такси меѓу кои се опфатени, се размислува и за нафтените деривати, за кои се уште нема одлука на владата, рече Бесими.
Премиерот Заев пак пред две недели тврдеше дека не се панираат нови даноци и зголемување на постојните за годинава.
Одлука нема, а министрите треба да пресечат и за намалувањето на ДДВ-то за електричната енергија од 18 на 5 проценти. Планот е според владини извори – со еколошката такса да се амортизира ударот врз буџетот од намалувањето на ДДВ-то за струјата, но и врз граѓаните од големо покачување на цената на електричната енергија.
Во делот на домаќинствата и делот на електричната енергија се разговара во намалување на ДДВ-то. Меѓутоа се уште нема одлука на влада и затоа не може уште да се соопшти. Откако ќе се направат анализите, ќе се направат претходно и консултации со засегнатите страни. Од друга страна истото важи во однос на еден консултативен процес, ќе следат и давачките, еколошките давачки во делот на дериватите.
Иако министерот не прецизираше детали, а ребалансот се уште не е ставен во Собрание, во јавноста протекоа детали од него. Па така минусот од 33 милиони евра од намалувањето на ДДВ-то за струјата, Владата планира да го компензира, од новата давачка за горивата, со која се планира од граѓаните и стопанството да се соберат 27 милиони евра. Новините треба да почната да важат од 1-ви идниот месец.
Александра Филиповска