Можно е зголемување на банкарските камати. За сега, ова е само опција што се разгледува во банкарските кругови. Официјално, системот е стабилен и ликвиден, но не е исклучено некоја од 15-те банки поединечно да ги зголеми каматните стапки.
Оваа неофицијална реакција ја предизвика одлуката на Уставниот суд, која содржи ревизија на позицијата на Фондот за осигурување депозити и го става во еднаква позиција со останатите доверители. Ваква реакција на банките не би била неочекувана и за експертите.
Народната банка испрати куса реакција – „Одлуката на Уставниот суд не треба да се контекстуализира со состојбата и стабилноста на банкарскиот систем. Тие состојби се ценат преку клучните параметри за неговото работење, а и на крајот од првиот квартал – остануваат поволни.“
Фондот за осигурување депозити ќе почека објавување на судската одлука во Службен весник, но објаснува дека „негова основна цел, како и до сега, е осигурување на депозитите на населението и обештетување на депонентите во случај на ризичен настан.
Иницијативата пред Уставниот суд ја поднесе Здружението на оштетени штедачи од Еуростандард банка. Но, одлуката нема да важи за нив и ќе почне да се применува за евентуалните наредни стечаи. Петмина уставни судии: Јован Јосифовски, Осман Кадриу, Елена Гошева, Никола Ивановски и Дарко Костадиновски, сметаат дека членот 163 став 3 од Законот за банки внесува нееднаквост и дискриминација на пазарот, кога предвидува дека Фондот за депозити ги подмирува штедачите до 30 илјади евра, а останатите, како и правните лица, треба да го чекаат својот дел од стечајната маса. Останатите четворица судии: Вангелина Маркудова, Добрила Кацарска, Насер Ајдари и претседателот Сали Мурати, не само што гласаа против, имаат и издвоено мислење. Тврдат дека не е можно споредување на два различни вида побарувања – на Фондот и на другите субјекти, бидејќи токму давањето предност на Фондот претставува заштита на јавниот интерес.
Фондот за депозити е во државна сопственост. Гарантира исплата на штедните влогови до 30 илјади евра. Во случајот на Еуростандард банка, тоа е веќе сторено. Останатите штедачи и фирми одржаа серија протести за да не чекаат распределба на стечајната маса и успеаја да го премислат Уставниот суд, кој во февруари одлучи да не поведува постапка, а на 21 април поведе, по што денеска и го укина оспоредниот дел од Законот за банки.
Соња Николовска