Ниту лидерската средба и договорот на Заев и Мицкоски за деблокада на Собранието не им помогна на пратениците да најдат компромис за три важни закони. Законот за нов клинички центар, за служба во АРМ и за наставниците и стручни соработници. Нема најави за излез од блокадата. Партиите не отстапуваат од своите црвени линии и инсистираат на својот предлог.
Опозициската ВМРО-ДПМНЕ не отстапува од илјадниците амандмани кои се поднесени на законите. Бараат и тие да бидат вклучени во процесите со свои сугестии. Нема да дозволат да се донесат решенија кои според нив се полни со недостатоци, и се извор на корупција.
До крајот на месецов собраниската комисија за здравство треба да одржи јавна расправа за изградба на нов клинички центар, на која ќе бидат поканети експерти кои треба да дадат свое мислење. Незивесно е дали и од таа расправа ќе произлезат заклучоци и колку тие ќе се имплементираат.
Јавна расправа неодамна се одржа и за реформите во образованието, но до пратениците се уште не се доставени заклучоците што беше причина опозицијата да ја блокира работата на комисијата за образование.
Јулијана Пешевска