Улогата на бизнисменот Јордан Камчев па и неговата сопруга Ана, еден од најспорните моменти во пресудата за „Рекет“. Ова е содржано во жалбите на двајцата осудени екс обвинителката Катица Јанева и сопственикот на поранешната 1тв Бојан Јовановски. Пред апелациониот суд истакнаа дека Камчев имал само статус на сведок, а не на оштетен иако наводно дал милиони евра на осудените. А тој пак имал интерес да куртули од истрагата „Империја“ која тогаш ја водело СЈО, рекоа адвокатите.
Спорни за одбраната се и снимките кој исто така нелегално ги снимал Камчев. Го запрашаа судот дали за него не е сомнително што се снимани во домот на бизнисменот а токму моментот на предавање на парите го нема. Торбата „Луј Витон“ пак ја изнесува Зоран Милевски Кичеец, кој призна вина ама велат како да носи пердув, а не милион евра во банкноти од по 50, кои пресметале дека би тежеле 25 килограми.
Одбраната побара да се укине пресудата и да се врати на повторно судење поради, како што рекоа, еден куп повреди во постапката. Вештачење на телефоните не им е дозволено, не е дозволено ниту доказ да биде снимен разговор мегу Камчев и Кичеец а форензичарите од МВР всушност не биле вештаци. Велат, нема ни еден доказ дека пари се предадени и дека така се влијаело Камчев да излезе од притвор. Вишиот обвинител пак побара да се зголемат затворските казни.
Исказите на Јордан и Ана Камчеви се во корелација со снимките, другите докази и сведочењата. Тие се надополнуваат и со тоа во целост се дава јасна слика за обвинението, велат од таму.
Екс обвинителката Катица Јанева од домашен притвор во Гевгелија, не дојде да ја презентира жалбата и тоа поради здравствени проблеми. Таа е осудена на 7 години затвор заради злоупотреба на службената положба, додека Боки 13 на 9 години казна заради рекет и перење пари.
Билјана Николовска