Со промената на имињата на улиците, граѓаните не мора веднаш да ги сменат личните карти, но економските експерти предупредуваат дека тоа ќе биде директен трошок за компаниите. Ќе влијае на нивната профитабилност која е лоша периодов.
-Компаниите, заради запазување на ажурноста како законска обврска уредена со Законот за даночната постапка, Законот за едношалтерскиот систем и Законот за регистрирање на готовинските плаќања ќе мора да: – ги променат податоците во Централниот регистар и да платат за тоа, да ги уредат записите во софтверите за издавање на фискални сметки и да платат за тоа, да ја известат УЈП преку РДО за ваквите промени и усогласат документација, интерни софтвери, интернет страници, што значи да трошат ресурси и време, пишува економскиот експерт Павел Гацов.
Комисијата што го составува регистарот денеска ќе ја изготви финалната верзија, која ќе треба да биде усвоена од Советот на Градот.Скопскиот градоначалник најавува благи корекции на списокот, но не и изземање на сите имиња за кои деновиве имаше реакции во јавноста. Отфрла каква било политичка конотација, велејќи дека само исполнува предизборно ветување кон скопјани, кои сакале да ги врати старите имиња на улиците.
-Ленинова не е во чест на Владимир Илич, Ленинова е за скопјани, Железничка е за скопјани, треба да се разбере тоа, вели Петре Шилегов, градоначалник на Скопје.
Во меѓувреме, реагираа и од Демократскиот сојуз на Власите, кои бараат од списокот да се тргне Али Паша Јанински, кој вршел геноцид врз влашкиот народ. Се бара да се тргнат и лицата од Призренската лига кои се идејни творци на идејата за Голема Албанија, а реакции има и за бришењето на имињата на револуционери и ставање на личности кои немаат допирна точка со Скопје.
Далиборка Демјанска
