Во подрачната единица на министерството за земјоделство во Прилеп во тек е пријавувањето на тутунот за кој производителите не склучиле договори, откако компаниите ветија дека ќе ги откупат овие вишоци од производството.
Тутунопроизводителите вишокот на тутун можат да го пријават и кај поверениците на откупните пунктови.
Засега не се знае точно колкави се количините, а за да се утврди, земјоделците имаат обврска да го пријават ова недоговорено производство.
-Според првичните податоци, во земјава има од 2000 до 4000 тони вишок. Но, кога ќе ги собереме податоците, ќе имаме реална слика колкави се количествата вишок тутун. Со ИДБР бројот и преку системот ќе провериме дали тие проиводители имаат некаде неисполнет договор. Така ќе се знае колку е вишок што откупувачите ветија дека ќе го преземат, земјоделците кои имаат договор, истиот ќе им биде продолжен и ќе биде откупен вишокот на тутун, вели Зоран Пачешкоски, раководител на подрачната единица на Министерството за земјоделство – Прилеп.
Досега се откупени околу 40 проценти од 23 илјади тони тутун колку што тежи годинешната реколта.
Просечната цена е 167 денари за килограм. Се планира целиот род да се преземе до крајот на февруари, а во спротивно ќе се бара рокот за откуп да се пролонгира.
Инаку годинешниот откуп започна со многу проблеми, реакции и протести на производителите кои се жалат на ниските откупни цени и слабата динамика на откуп.
Во неколку наврати се одржаа средби на откупувачите и тутунарите со медијаторство на министeрот за земјоделство, а по последната средба минатата недела, откупот се одвива со поинтензивна динамика со што се врати оптимизмот кај тутунарите.
Емилија Мисирлиевски