Со математички анализи и пресметки доловена епидемиолошката слика во земјава е далеку поцрна од тоа што имаме претстава – тврди универзитетскиот професор Дејан Трајковски. Потпирајќи се на бројки извадени од официјалната светска датабаза за Ковид-19, професорот на социјалните мрежи пишува – Македонија е помеѓу најлошите земји според црните статистики. Дијаграмот којшто професорот на Техничкиот факултет при Битолскиот универзитет го има ре-објавено на својот фејсбук профил, се отсликани моменталните седумдневни просеци на дневниот број на починати на милион жители од 13-те земји со најголем кумулативен број на починати од почетокот на епидемијата до денес, исто така на милион жители.
Најлоши сме меѓу најлошите на светот! Јасно е дека со вакво темпо Македонија ќе ги достигнува и престигнува земјите кои се повиоко од неа на листата според кумулативната смртност, пишува Трајковски во својата објава.
Според него, единствено решение е целосен четиридневен карантин за драстичен пад на бројките на новозаразени, а потоа со сериозно придржување до другите мерки и препораки коишто се на сила, бројот на новозаразени да се одржува низок. А, министерот за здравство од владината говорница денес повторно го кажа тоа што веќе е кажано досега – полициски час не е потребен. Целосното замирање на економијата се уште не е на агендата на лицата кои одлучуваат во борбата со Ковид-19.
Според министерот, состојбата со Корона вирусот е под контрола и последните донесени мерки даваат резултат.
Пред нас е зимски период, вирусот ќе опстане, а почитувањето на мерките е неопходно смета Филипче. Пикот на заразата сепак веќе е поминат, уверливо кажа министерот на прес-конференцијата, дополнително насочувајќи ги надежите кон вакцината која е се поблиску.
Петар Догов