По целата линија на фронтот во самопрогласената република Нагорно Карабах и денеска продолжува размена на артилериски оган, соопшти ерменското Министерство за одбрана.
– Ерменските единици за противвоздушна одбрана соборија две непријателски беспилотни летала над градот Степанакерт, изјави претставничката на Министерството за одбрана во Ереван, Шушана Степанијан.
Во исто време, азербејџанското Министерство за одбрана утрово соопшти дека ерменската артилерија го гранатира градот Тертер, кој се наоѓа на самата линија на фронтот.
Според достапни извештаи од местото на настанот, ерменската артилерија ја уништува инфраструктурата, а во нападите има и цивилни жртви.
Премиерот на Ерменија, Никол Пашинјан изјави дека нема воено решение за конфликтот во Нагорно Карабах. Тој додаде дека се надева дека сега, кога, како што рече, не успеа да ги спроведе плановите на неговото воено раководство, Азербејџан ќе сфати дека конфликтот во Нагорно Карабах нема воено решение. Пашијан за телевизијата Русија 1 изјави дека спорот околу територијата, која прогласи независност од Азербејџан во 90-те години на минатиот век и во која Ерменците се мнозински народ, треба да се бара преку преговори под покровителство на копретседавачите на групата Минск на ОБСЕ. Сепак, тој додаде дека ваквите преговори бараат „соодветна атмосфера.
Зад затвопрени врати синоќа и Советот за безбедност на ОН одржа состанок, по што излегоа со заедничко соопштение во кое изразија загриженост за судирите што избувнаа околу Нагорно Карабах, кои се закануваат да прераснат во општа војна меѓу Ерменија и Азербејџан и остро ја осудија употребата на сила. Во соопштението на Советот за безбедност се наведува дека неговите членови го поддржуваат повикот на генералниот секретар на ОН до завојуваните страни итно да ги запрат борбите, да ги деескалираат тензиите и да се вратат на преговори без одлагање.