Песна за опуштање и осознавање на способностите на идните првоодделенци.
Вака весело беше денеска во основното училиште „ Димитар Миладинов“, во скопската Општина Центар, каде идните првачиња со родителите дојдоа на запознавање со училиштето, наставничките, но и мерките за заштита од Ковид -19.
Се читаа списоците на класовите со првоодделенци, децата ги видоа училниците, го учеа распоредот за движење со растојание, при влегување и излегување, им се мереше температура и беа дезинфицирани.
Но, родителите се поделени околу примената на мерките од најмладите. Некои веруваат дека ќе се навикнат, а други се загрижени и очекуваат децата да бидат повеќе згрижени.
“Па гледате каков циркус е ова. Нема да се снајдат. До Нова година вака ќе пробуваат со мерки и после ќе се вратиме по старо” – вели татко на еден првоодделенец.
“Се надевам дека ќе научат да држат дистанца. Инаку тешко ќе биде, сепак се многу малечки” – изјави една мајка на првоодделенка.
“Мислам дека ќе биде во ред. Ќе се навикнат брзо. Не , немаат страв” – ни изјави татко на првоодделенец.
Наставничките сакаа да знаат какви се желбите на идните ученици.
А, и ние ги прашавме децата, што сакаат .
“Сакам најмногу да учам сè ” – ни рече едно момче.
“Да си играм со другарчињата” – вели едно девојче.
Во училиштетото „Димитар Миладинов“, од 1 октомври, во школските клупи, поделени во 3 класа, ќе седнат вкупно 67 првоодделенци.
Сотир Трајков