Весна Дамчевска Илиевска, член на Иницијативниот одбор кој деновиве повикува на свикување вонреден конгрес на ВМРО – ДПМНЕ, во полиција пријавила закани и како што вели во соопштението до медиуми, насилство нема да толерира.
„Да се бара одговорност од раководството и одржување на Вонреден Конгрес е демократски чин. Да се испраќаат разни ликови пред нечиј дом, да се пишуваат вулгарни зборови со говор на омраза, обвинувања без основа, лични навреди, на социјалните мрежи е кукавички и нечовечeн чин“, пишува Дамчевска, која беше парламентарец од редовите на ВМРО – ДПМНЕ во предхониот состав.
За Телма од МВР велат дека двајца заканувачи се во полициска станица на разговор откако по пријавата биле повикани во полиција. Од МВР велат дека работата на целосно расчистување на случајот.
Дамчевска заедно со дел од членството на ВМРО – ДПМНЕ бара оставка од лидерот Христијан Мицковски по изборниот пораз и неисполнување на ветувањето за да состави влада.
„На Македонија и треба здрава опозиција која демократски комуницира и ги решава отворените прашања. Насилството мора да остане во минатото бидејќи ВМРО-ДПМНЕ може да оди напред само со отворена дебата и соочување на фактите“, пишува Дамчевска – Илиевска во соопштението.
Иако поминаа веќе две недели откако Иницијативниот одбор бара свикување вонреден конгрес на ВМРО – ДПМНЕ, лидерот Мицковски се уште ништо не одговорил.
Билјана Ставрова