Пет дена по добивањето на мандатот за составување Влада, Зоран Заев објави дека има поддршка од 62-ца пратеници. Повеќедневните преговори со ДУИ попладнево резултираа со договор за продолжување на Владината коалиција.
Четири години со неа ќе раководи Заев, благодарение на, како што рече, доблеста, храброста и мудроста на Али Ахмети. Заев возвратил со доблест, па последните 100 дена ќе ги отстапи на премиер од ДУИ, кој нема да се нарекува технички, бидејќи пржинската Влада ќе се укине.
По средбата со Заев, Ахмети изрази уверување дека е договорена солидна Влада која ќе овозможи брзо ставање во функција на сите институции.
Лидерите договориле Талат Џафери да остане претседател на Собранието. Ги договориле и министерските места, но ќе ги соопштат утре, откако ќе добијат виза од партиските тела. Заев најави дека нема да има министри без ресор освен вицепремиери и дека ќе дојдат квалитетни и отчетни кадри. Програмата на Владата вклучува справување со здравствените и економските предизвици, како и други теми преземени од партиските програми.
До крајот на неделата, се очекува мандатарот да ги достави до Собранието составот и програмата на новата Влада. Седницата за нејзин избор ќе ја закаже старо-новиот спикер Џафери, од кого се очекува до крајот на неделата да го закаже продолжението на конститутивната седница.
Соња Николовска