Во Дебар последните денови видно се зголемува бројот на заболените од коронавирусот и таа бројка од почетокот до денеска изнесува 108 како и два случаи во руралната општина Центар Жупа. Четири лица од кои три во Дебар и еден во Центар Жупа ја загубија битката со вирусот Ковид-19. Само за една недела во Дебар се регистрирани околу 20 болни од Коронавирус, од кои најголемиот број се млади лица.
Дебарскиот епидемилог Ментор Мела денеска изјави дека состојбата се влошува поради непочитување на мерките за заштита од вирусот, поради што дојде и до губење на контролата над класерите, што секако ја отежнува состојбата. Мела изјави дека моментално бројот на активните болни во Дебар е 51, додека за десет лица се чекаат резултати од тестовите. Според Мела во последно време поради непочитување на протоклот од страна на дел на угостителски објекти, вирусот се шири кај младите .
Во општата болница според директорот Баки Алили има потреба од нови кревети. Затоа тој има побарано од Црвениот крст специјален шатор со десет кревети, а моментално во болницата се во функција три простории, од кои во две се дава терапија на болните од Ковид-19 и во една на пациенти кои имаат симптоми на овој вирус.
Во болницата исто така се оценува дека се потребни инфектолог, пулмолог и други специјалисти.
Инаку поради влошената состојба локалната самоуправа во Дебар апелира до населението да ги почитува мерките за заштита од Ковод 19., но сепак голем е бројот на населението кое не користи маски.