На последниот ден од мандатот државниот обвинителот Љубомир Јовески се огласи со писмено обраќање. Обвинителството било транспрантно и отчетно а нападите најчесто неосновани.
Ниските оценки и критиките за борбата против корупцијата и во извештајот на ЕК, според Јовески не се однесуваат директно на обвинителството, туку се инсистира државата да обезбеди повеќе ресурси.
-Дали во изминатите шест години можевме и подобро и повеќе? Сигурно да, но во ниту еден момент не сум престанал да се залагам за повеќе и за подобри резултати, пишува Јовески
Довербата во обвинителството, според државниот обивнител во заминување, е поголема од тоа што се прикажува во анкети кои не биле релевантни. Се создаде атмосфера дека довербата во нашата работа е нереално многу ниска, а во правосудството има и предмети кои се граѓански во кои не постапува обивнителството, пишува Јовески. Граѓаните поднесувале се повеќе кривични пријави што за него е показател дека довербата во иституцијата што ја предводеше 6 години се зголемува.
-Анкетите, онака како што се прават за политичарите и политичките партии, не се соодветни за мерењето на довербата во работата на Јавното обвинителство, вели Јовески кој посочува истражување на Светска банка кое деновиве и целосно ќе биде објавено, а се однесува на состојбите со јавната перцепција на правосудството кај нас.
Позитивна оценка дале 28% од граѓаните и 33% од бизнисмените. Запрашани за ефикасноста конкретно во нивниот предмет за оние што имале такво искуство 47% од граѓаните и 37% од бизнисмените рекле дека се задоволни.
Јовески со порака и до колегите да бидат истрајни и упорни затоа што потрагата по правда е маратон, а не спринт трка на кратки патеки
– Ве повикувам во секоја можност да ја демонстрирате својата истрајност и решителност во борбата против криминалот. Не дозволувајте поединци да ја извалкаат професијата во која секојдневно се вложувате. Со чесна и напорна работа вашите резултати нема да останат непрепознаени од јавноста.
Обраќањето Јовески го почнува со цитат од Абрахам Линколн а го завршува со честитки за претојните празници.