Егзибициите на опозицијата не би ги коментирал. Тие се само континуитет на оние предавства и порази кои што ги направија во минатото, одговори премиерот Христијан Мицкоски на новинарско прашање за коментар на обвинувањата од лидерот на опозициската СДСМ, Филипче кој рече дека „наместо да се напредува во евроинтеграциите, се назадува, нема политичка волја и се отвораат веќе затворени прашања“.
„Додека жестоко се бориме како влада да ги повратиме позициите кои што тие ги оставија во минатото слободни и ги предадоа националните интереси на државата, тие гледаат од зад грб дополнително да стават товар. Ние сме силни и ќе го издржиме сето тоа. Мислам дека тоа е погрешна политика која што ја води опозицијата. Мислам дека политиката на свиткана кичма, на предавства, на лесно потпишување договори и слично нè доведе во оваа ситуација во која што сме. Оваа влада и дипломатија работи на враќање на изгубените позиции, но и на светот да му покаже во суштина што се крие поради срто она кое што порано беше кажувано како едноставна работа, само да се промени уставот и завршено е се. Готово, ќе почне мед и млеко да тече по улиците, птиците ќе пеат, цвеќињата ќе растат и се ќе биде перфектно, а во суштина не е така“, одговори Мицкоски.