Владата го именуваше Сашко Мицевски, филмски и ТВ монтажер и дизајнер на звук, за нов в.д. директор на Агенцијата за филм.
Мицевски студирал филмска и ТВ монтажа на Факултетот за драмски уметности во Скопје, а во 2015 година, како добитник на стипендија од Министерството за образование и наука, заминува на постдипломски студии на престижната National Film and Television School во Англија, каде учи од етаблирани професионалци како Греам В. Хартстон („Blade Runner“, „Aliens“), Енди Кенеди („The Crown“, „Game of Thrones“, „Harry Potter“) и Роџер Дикинс („Sicario“, „Skyfall“, „1917“) и работи на филмови прикажани на реномирани меѓународни фестивали.
Неговото професионално искуство опфаќа работа во Англија на проекти за „Би-Би-Си“ и филмови во продукција на „Пинвуд Студиос“ (Pinewood Studios) – („Sherlock Gnomes“, „Mowgli“, „Fantastic Beasts: The Crimes of Grindelwald“ и „Birdbox“), како и авторски ангажмани во пост-продукција на македонски аудиовизуелни дела, меѓу кои и ТВ сериите „Преспав“ и „Куќен притвор“.
Добитник е на бројни награди, меѓу кои награда од Ројал Телевижн Сосајати (Royal Television Society) и номинација за „Дејтајм Еми“ (Daytime Emmy).
Во 2020 година, со сопствени средства го возобновува тонското студио на НУФЦ „Вардар филм“, а од истата година е и член на Филмскиот совет на Агенцијата за филм.