Израел им забрани на своите државјани да ја напуштаат земјата. Како образложение за тоа наведе безбедносни проблеми по ескалацијата на конфликтот со Иран.
Според весникот Харец, владата им наложила на домашните авио-компании да не дозволуваат на израелските државјани да се качуваат на летови за заминување, бидејќи растел стравот од потенцијални ирански одмазнички напади врз израелските аеродроми. Главниот меѓународен аеродром во Израел, Бен Гурион останува затворен до укинување на одлуката.
Израелската министерка за сообраќај Мири Регев нагласи оти во моментот е дозволен излез од земјата само на државјани кои не се израелски, како дипломати и туристи. Таа потврди дека израелската влада подготвува операција за репатријација на повеќе од 100.000 израелски државјани кои моментно се наоѓаат во странство, мисија за која додаде дека ќе се спроведува плански и во фази.