Музејските работници во Македонија го дочекаа 18. Мај- Меѓународниот ден на музеите со дефицит на кадар за конзервација и реставрација на артефактите и делата од збирките. Има конзерватори , но не во доволен број во МСУ, Музејот на Македонија, Археолошкиот музеј и Националната галерија на Македонија, вели претседателот на Македонскиот национален комитет на ИКОМ. Според него, ова е проблем што се провлекува со години.
- Тоа е голем проблем кој се одолговлекува последниве десетина години. Значи, се помалку и помалку конзерватори се заинтересирани, т.е. луѓе кои што се заинтересирани за да работат на конзервација на дела, вели Благоја Варошанец, претседател на МНК-ИКОМ.
Според Варошанец, проблем до 2016 година биле и депоата во музеите, каде се чуваат вредните експонати, но состојбата полека се поправа преку грантови и поддршка од државата. Целта е , вели претседателот на МНК-ИКОМ, нашите музеи да ги достигнат светските стандарди околу чувањето, заштитата и презентацијата на нашето вредно културно наследство. Но, тоа не е нивната единствена функција, што ја диктира новото време, кажа Здравко Стојкоски, кустос- историчар во Музејот на Македонија.
- Треба да бидат двигатели на економскиот развој, креатори на нови иновации, на нови технологии, да соработуваат со науката и образованието и да помагаат во изградбата на едно поинклузивно и поодржливо општество, рече Здравко Стојкоски, кустос- историчар во Музејот на Македонија.
Темата со која светот годинава го одбележува Меѓународниот ден на музеите е „ Иднината на музеите во заедниците кои брзо се менуваат“. Оваа тема соодветствува со едукативниот карактер на публикацијата за Кузман Јосифовски – Питу, еден од двигателите и организаторите на антифашистичката борба за ослободување на Македонија во Втората светска војна, чиј автор е Стојкоски. Таа денеска беше промовирана во Музејот на Македонија.
- Главната цел на книгата „ Кузман Јосифовски- Питу : Животна приказна“ е томку тоа. Таа да послужи како прирачник во образованието и за музејска едукација, кажа Даниела Трајкова- Крстиќ, промотор на публикацијата.
Според програмата за инвестиции на ресорното министерство за 2025 година , Музејот на Македонија е единствен од сите во државата , за кој се издвоени средства за поправка на кровот што протекува со години, во висина од 15 милиони денари или околу 244 илјади евра.
Сотир Трајков