Поради тоа што дел од вработените во јавниот сектор го добиваат, а други не, додатокот на плата од 30 отсто, лица на иста позиција и со исто образование имаат различни месечни примања. Освен во финансии, Службата за општи заеднички работи, Генералниот секретаријат на Влада и уште некои институции, во другите меѓу кои во Министерството за правда, за економија, за животна средина, за дигитална трансформација, ДЗС, Државниот архив, не се исплаќа овој додаток, затоа што финансии не даде зелено светло.
Од УПОЗ велат дека, иако преговорите за ова биле на самиот крај, добиле нов услов од Владата.
За да може и другите вработени во јавниот сектор да го добијат додатокот, треба или да се откажат од Општиот колективен договор или, пак, да се одложи неговата примена.
„За нас тоа не е прифатливо Воопшто не беше ниту преговарано додека се договаравме со владата односно со премиерот за на крај на последните средби да ни биде тоа ставено како услов на маса. И на крајот на последната средба со премиерот рече дека е спремен да се потпише, дека ќе се потпише на почетокот на мај. Еве, почетокот на мај е во четврток, но уште немаме информација од нивна страна, дали ќе ги потпишеме сите тие колективни договори со останатите институции. и има разлика на плата. Едни вработени имаат додаток други немаат“, вели за Телма претседателот на УПОЗ, Трпе Деановски.
Уште еден проблем е и тоа што вработените во јавниот сектор платата за март ја добија без покачувањето од 12,6 отсто, како што е предвидено со тој Општ колективен договор.
Од синдикатот појаснуваат дека поради тоа што до крајот на 2024 година, Владата не стави потпис на овој договор, во јавниот сектор платата треба да се исплаќа со плус 12 проценти, колку што порасна просечната.
„Тој си е на сила, има нова методологија за пресметка на плати, за жал не се потпиша од оваа Влада. Имаме прес конференција каде беше истакнато дека сите вработени во јавниот сектор имаат право на тужба, додава Деановски.
На вработените, пак, во Министерството за економија, пазарниот и трудовиот инспекторат во петокот доцна попладне им беше исплатена платата за март, со задоцнување од десетина дена поради проблеми кои настанаа со трансформацијата на институциите.
Ирена Чачкова