Двајца полициски службеници од обезбедувањето на претседателката Гордана Силјановска го лажеле колегата дека приватно непрописно паркирано возило е службено, потврди доцна синоќа МВР преку соопштение во кое наведува дека е отворена дисциплинска постапка за двајцата припадници на 6-та Управа.
Во соопштението на МВР нема податоци дали е отворена и кривична истрага бидејќи според опишаното се подгрева сомнеж дека двајцата полицајци направиле дејствија кои личат на злоупотреба и на спречување на службено лице во вршење службено дејствие. Дополнително со полицискиот етички кодекс, полицајците „не треба да создаваат или изнесуваат лажни тврдења во поглед на нивната службена положба, статус и овластување.“
Не е јасно ниту зошто за поршето паркирано од Срѓан Керим среде улица, внатрешната контрола спровела постапка дури откако видеото беше објавено на социјалните мрежи, а не кога се случило на 22-ри март за време на националната жалост за трагедијата во Кочани.
Тогаш припадниците на 6-тата Управа тврделе дека поршето е службено, но по реакција на група млади луѓе и по проверката на полицаецот кој бил во придружба на пајак службата, скапото возило е подигнато и однесено на депо.
-Систем, еве го системот, браво!!!, викаат младите кои бараат пајакот да го дигне поршето кое со часови стоело на улица и со аплауз ја поздравуваат одлуката на полицаецот од придружбата на пајак службата.
-Двете лица кои се претставиле како полициски службеници и тврделе дека возилото е службено, со патничко возило „форд мондео“ се упатиле кон депото. Полициските службеници од ОВККИПС (Внатрешна контрола на МВР) извршиле проверки за возилото „форд мондео“ и констатирале дека истото го управувале полициските службеници Т.Д. и И.С., распоредени во Одделението за лично обезбедување на Претседателот на РМ,соопштија од МВР.
За една седмица ова е втор инцидент со припадници на 6-тата управа, беше уапсен припадник на обезбедувањето на премиерот Мицкоски како продава полициски доверливи информации, а двајцата од обезбедувањето на Силјановска лажеа колега-полицаец.
Лани, пак за еден месец двапати киксна обезбедувањето на спикерот Африм Гаши- кога негов телохранител мавташе со пиштол во заштитена зона на скопскиот аеродром, а потоа му беше организиран брз премин на конвој на Гаши за одење на свадба во Косово.
Регрутацијата во 6-та Управа треба да биде професионална од обучени полицајци, а не преку лични и врски и политички канали, смета поранешниот полициски началник Љубомир Ѓурчевски.
-Пред се, тоа треба да се полициски специјалци кои минимум треба да имаат 5 години професионален стаж и соодветна обука. Начинот на кој сега се регутираат изгледа сам по себе регрутира и одредени проблеми. Факт е дека години наназад, години наназад имаме состојба кога во 6-тата управа се регрутираат, изгледа и лица кои во определен период соработуваат и влегуваат во недозволени дејствија, кримигоени дејствија, изјави за Телма, Љубомир Ѓурчевски, поранешен полициски началник.
Ѓурчевски вели дека со избор на такви лица се ставаат под ризик и во опасност и личностите кои се обезбедуваат, како претседателот, премиерот или парламентарниот спикер.
Ѓурчевски смета дека изборот на обебзедување на државни функционери треба да се дигне на највисоко ниво во Бирото за јавна безбедност и во МВР, а тие што ги избрале и ги поставиле во 6-тата управа, полицајците кои прават инциденти и кривични дела- да си понесат одговорност.
Миомир Серафиновиќ