Домашните експерти се изненадени од одлуката на Трамп за воведување на 33 отсто царина за увоз на производи од Македонија. Велат дека ваков потег не очекувале. Според, нивните сознанија повисоката царина е резултат на суфицитот кој го покажуваат бројките од американското биро, а кој се спротивни на домашните анализи.
„Според, нашите статистички податоци Македонија има дефицит во надворешно трговската размена и заради тоа не се очекуваше ваква царинска стапка. Но, за жал податоците од американското биро покажуваат дека земјава има суфицит во трговската размена со САД така што од тука произлегуваа оваа висока царинска стапка“, вели Никица Мојсоска Блажевска, извршна директорка на „Македонија 2025“.
Ваквата одлука на САД ќе погоди дел од секторите. Иако, барем засега не се очекува да се намали инвестирањето во земјава, треба да сме загрижени. Преку дипломатските претставништва и бизнисот ќе се бара преиспитување на одлуката.
„Индиректниот ефект би рекла дека тука е многу поголем. Тука ја гледам главно автомобилската индустрија, петрохемиската индустрија, итн. Сметам дека и услугите ќе бидат засегнати тука ја споменав нашата дијаспора која што главно отвора компании во Македонија кои главно сервисираат компании во Америка“, додава Мојсоска – Блажевска
Но, каква порака се праќа со повисоките царини за увоз од нашата земја, со оглед на тоа што Македонија со САД со години негува стратешко партнерство, а во последниот период македонска делегација и премиерот Мицкоски неколку пати беа во посета на земјата, професорот Славевски одговори дека на ова не треба да се гледа со чувства. А она што сега треба да го преземе владата е намалување на одреден давачки.
„Не сега да ги зголемуваат царините како што е најавено од Јапонија, Јужна Кореа и Европската Унија туку да ги намалат. Мислам дека е најдобро ние да видиме колку можеме она што ни се забележува дека е трговска бариера на нашиот увоз од САД да го намалиме“, вели универзитетскиот професор Трајко Славевски.
Според Државниот завод за статистика, во 2024 година увозот од САД е околу 200 милиони долари, а извозот е 118 милион долари.
Податоците од Царинската управа, пак, покажуваат дека најмногу од САД увезуваме лешници за кои има царина од 15 отсто, оружје со 7 проценти, а 0 отсто царина во земјава од таму се внесуваат видови машини, барут, делови за возила и специјални возила.
Ирена Чачкова