Лидерите на ВМРО-ДПМНЕ и на СДСМ, Христијан Мицкоски и Венко Филипче се договорија да формираат заеднички работни групи за спроведување на реформската агенда на земјата. Првите три области на кои заеднички ќе работат се правосудството, енергетиката и здравството. Ова е резултат од нивната едно и пол часовна средба во владата, која лидерот на СДСМ ја нарече нов формат на соработка, каков што досега немало.
„Значи првичните закони коишто треба да стигнат во Собранието во делот на правосудството, нешто што ги тангира сите граѓани, понатаму – енергетиката и некои работи во однос на стратешките движења и проекти во здравството. Ова е првичен состанок, ние се уште треба да видиме каква ќе биде таа методологија, да ја разработиме, меѓутоа, морам да кажам, дека има волја од двете страни“, изјави Филипче по средбата со Мицкоски.
Филипче најави дека прво што ќе направи е да номинира неколку експерти од областа на правосудствот и енергетиката кои би се вклучиле во изработката на законите кои се дел од реформската агенда, а кои треба да стигнат во Собранието.
Од владата по средбата пак беше лиферувано соопштени во кое се нагласува потребата да се работи на консензус меѓу различните страни за клучните прашања за државата, со мобилизирање на сите напредни поединци и структури кој можат да дадат придонес на патот за развој на земјата.
„Македонските државни интереси треба да бидат појдовната точка во разговорите за секое прашање“, се наведува во соопштението на Владата.
Мицкоски притоа, како што се наведува во соопштението, побарал од Филипче да се потруди да биде конструктивен фактор во определбата за промени, реформи и напредок.
На средбата двајцата партиски лидери не ја отвориле темата за можни предвремени избори, но разговарале за евроинтеграцијата на земјата и уставните измени, за што ставовите им се разишле.
„За жал тука имаме различни позиции и ги разбирам позициите на премиерот. Останува за ова да зборуваме дополнително“, рече Филипче.
Филипче и пред и по средбата ги отфрли обвинувањата од ДУИ дека средбата води кон моноетничка демократија и остранување на Албанците од сите нивоа на власта, велејќи дека очекува на следната лидерска средба, за која денеска не е договорен датум, да се вклучат и лидерите на другите партии.
Тамара Грнчаровска