Стартот на третата рунда на мастерс тенискиот турнир Индијан Велс не донесе изненадувања во машка конкуренција, а фаворитките ја оправдаа улогата и во женска конкуренција.
Шестиот носител Данил Медведев одигра само два гема против Алекс Микелсен, кој се повлече поради повреда. Русинот во осминафиналето ќе се соочи со 10-тиот фаворит Томи Пол, кој пак беше подобар од Камерон Нори во два сета.
Стефанос Циципас во два сета со по 6-3 го елиминираше Матео Беретини, па следен предизвик за Гркот ќе биде Холгер Руне. Данецот го победи Иго Умбер во три сета. Франсес Тиафо беше изненаден од Јапонецот Јосуке Ватануки, а победи остварија и Талон Гриекспор, Артур Филс и Маркос Гирон.
На женскиот дел од турнирот во калифорниската пустина, втората носителка Ига Швјонтек со 6-0 и 6-2 беше подобра од Дајана Јастремска. Полјачката во следната рунда ќе игра против Каролина Мухова, која пак во чешката пресметка ја победи Катерина Синијакова.
Елена Рибакина до осминафиналето дојде со триумф против Кејти Бултер, Џесика Пегула исто така беше сигурна, како и Чинвен Женг против Лулу Сун. Во осминафиналето се и Мира Андреева, Елина Свитолина и Марта Костјук.