Уметничката група Три ќе реализира групна изложба во МКЦ

Изложба на уметничката група „ Три“ , ќе биде отворена на 17 февруари во галеријата на Младинскиот културен центар. Изложбата го поставува прашањето, зошто не сега , а се однесува на евокативното истражување на контрасти, медиуми и уметнички потенцијал на монохроматското. Во срцето на уметничкото изразување лежи меѓусебната игра на контрасти, каде што разликите го обликуваат наративот на заедничката визија. Зад ова групно претставување стојат проекти на нашите докажани уметници : Страхил Петровски, Лазе Трипков и Ангел Коруновски.

• Хроматски контрасти: сенки, отсуство и рефлексија“ , ги обединува тројцата препознатливи македонски уметници Петровски, Коруновски и Трипков, чии дела ги истражуваат димензиите на монохроматската, црната боја и апстракцијата. Оваа тријада на медиуми, стилови и перспективи се спојува за да ги осветли длабоките начини на кои отсуството и присуството можат да ја обликуваат нашата перцепција за реалноста. Во нивните уникатни пристапи кон црното како доминантна сила, овие уметници поставуваат убедливо прашање: зошто да чекаме да се вклучиме во длабоките можности на сегашниот момент, се вели во најавата за настанот.

• Страхил Петровски  ќе се претстави со проектот„ Сенките/ Светлината “. Тој преку своите светло – темни композции- формации, составени во голема просторна инсталација ја доловува минливата убавина на урбаните сенки во дваесетина дела (слики и објекти, во период од 2016 до 2025 год.) работени во комбинирана техника, на платно, филц, дрво и (не)сликарски материјали… Секоја слика/објект, поединечно или во групација ја открива невидената кореографија на барокно-ренесансната светлина и темнина во секојдневните физички и ментални простори и форми, нивните сенки, архитектонски и апстрактни и на моменти еформелистички и калиграфски линии, дамки, потези, форми / (не) форми…поделени од сончевата светлина, ефемерните форми на движење, статичност или замрзнатост на одредени моменти. Делата на Петровски не повикуваат да се соочиме со минливата природа и да го перцепираме светот околу нас, од еден поинаков агол на гледање. Прашањето: „Зошто не сега…?“ резонира во неговите слики, објекти и инсталации и не “принудува” да го видиме она што инаку би можеле да го занемариме и пропуштиме во одредени моменти од нашето битисување.
• Ангел Коруновски ќе ја претстави „Црната бездна“ . Монохроматските црни слики на Ангел Коруновски навлегуваат во празнината како место на можност и длабочина. Неговите дела се минималистички, но богати, секое платно открива суптилни текстури, градации на тонови и тивок интензитет кој е длабоко медитативен. Уметноста на Коруновски ги предизвикува гледачите да се соочат со прашањето „Зошто не сега…?“ како покана за пауза, за задржување и за вклучување во емоционалната тежина на сегашноста. Во неговото црно, нема празнина, туку бесконечен пејзаж на контемплација.
• А, Лазе Трипков ќе го презентира проектот „Рефлексии во геометријата“. Десетте негови геометриски илустрации даваат остар контрапункт на органските форми на Петровски и текстуралните истражувања на Коруновски. Со прецизност и симетрија, неговите дела ги трансформираат линиите и формите во рефлексии на рамнотежа и ред. Сепак, дизајните на Трипков не се статични – тие вибрираат со енергија што зборува за итноста на сегашноста. Неговите композиции се визуелен потсетник дека структурата и спонтаноста можат да коегзистираат и дека „Зошто да не сега…?“ е повик да се прифати хармонијата и во мислата и во делувањето.