Нејмар го напушта саудискиот клуб Ал Хилал и ќе се врати во Бразил, односно во својот матичен клуб Сантос. Фудбалерот е подготвен да жртвува милиони евра само повторно да заигра за бразилскиот клуб каде ја почна блескавата кариера.
Неговата авантура во Саудиска Арабија можеби беше финансиски исплатлива, но спортски Бразилецот мина катастрофално. По трансферот од 90 милиони евра во летото 2023 година, Нејмар за Ал Хилал одигра само седум натпревари поради тешката повреда и постигна еден гол со една асистенција.
Ал Хилал ќе се согласи предвреме да го раскине договорот со фудбалерот што истекува во јуни 2025 година и е подготвен да го пушти во Сантос, каде одигра 225 натпревари и постигна 136 голови во периодот од 2009 до 2013 година.
Потоа играше и за Барселона, а во 2017 година го направи најскапиот трансфер во историјата во ПСЖ за 222 милиони евра.