Инцидент со физичка пресметка се случил утрово на граничниот премин „Меџитлија“ на македонско-грчката граница.
Pретпоставен од граничната полиција наводно физички и вербално нападнал вработен полицаец, објавиja попладнево повеќе медиуми. Инцидентот, според информациите, се случил околу 8 часот, кога се менувала смената, а причината засега не се знае.
Нападнатиот полицаец по 10 часот побарал лекарска помош во Клиничката болница во Битола, вознемирен и повреден од физички напад. Но, подоцна и неговиот претпоставен побарал да го прегледа лекар.
Од Клиничката болница Битола го потврдуваат случајот и за локалниот портал „Апла“ велат дека „имало вербална расправија со поттурнување и констатирана вознемиреност“, но велат дека и двајцата – и граничниот полицаец и неговиот претпоставен, побарале лекарски преглед.
Од МВР информираа дека во текот на денешниот ден (02.10.2024) во ПС ОН Битола во два наврати, еднаш од страна на полициски службеник Б.Ј., а вториот пат од Командирот на ПС за ГП и ГН Меџитлија И.П. пријавен е настан.
„Со цел утврдување на наводите во двете пријави, известен е Одделот за внатрешна контрола, криминалистички истраги и професионални стандарди“, велат од МВР.