Седницата за избор на новата влада е закажана за сабота во 11 часот, е потврдено од кабинетот на Претседателот на Собранието Африм Гаши. Собранискиот Деловник предвидува таа да трае најмногу два дена. Гласањето за избор на Владата се врши по предлогот за состав на Владата во целина, со јавно гласање. Гласањето се врши по завршување на претресот, а најдоцна во 24 часот. За избор на владата се потребни гласови на мнозинство од вкупниот број на пратеници.
Мандатарот и лидер на ВМРО-ДПМНЕ, Христијан Мицкоски, вчера во законодавниот дом го достави предлогот за состав на владата и програмата за нејзината работа. Новиот владин кабинет ќе брои 24 члена. Покрај премиерот, ќе има уште 23 вицепремиери и министри, од кои 20 со ресор.
Во владиниот кабинет на Мицкоски, 15 членови се од коалицијата предводена од ВМРО-ДПМНЕ, шест од коалицијата Вреди и двајца од ЗНАМ.
Досегашниот технички министер за внатрешни работи Панче Тошковски е предложен за министер во овој ресор, за надворешни работи и надворешна трговија актуелниот градоначалик на Општина Аеродром, Тимчо Муцунски, а за финансии потпретседателката на ВМРО-ДПМНЕ, Гордана Кочоска Димитриеска. За заменик претседател на Владата и министер за транспорт е предложен партискиот потпретседател и пратеник во повеќе мандати, Александар Николовски, во ресорот одбрана Владо Мисајловски, пратеник и поранешен министер за транспорт, а за информатичко општество и дигитална трансформација досегашниот дополнителен заменик министер во овој ресор, Стефан Андоновски. Министер за локална самоуправа ќе биде поранешниот директор на ЈП „Водовод и канализација“ Златко Перински кој во изминатиот период го водеше и кабинетот на Мицкоски.
Со новоформираното Министерство за енергетика, рударство и минерални суровини ќе раководи Сања Божиновска, актуелна членка на ИК на ВМРО-ДПМНЕ и експертка во енергетиката, Цветан Трипуновски во земјоделство, шумарство и водостопанство, Весна Јаневска во образование и наука, во Министерството за култура и туризам актерот Зоран Љутков, а во Министерството за спорт ракометарот Борко Ристовски.
Вицепремиерски места ќе имаат и коалициските партнери Социјалистичката партија (СП) и Демократската партија на Србите (ДПС). Љупчо Димовски, претседател на СП, ќе биде вицепремиер и министер за политички систем, а Иван Стоиљковиќ, претседател на ДПС, вицепремиер задолжен за односи со заедниците, додека Шабан Салиу ќе биде министер без ресор задолжен за интеграција и имплементација на декадата на Ромите.
За министер за животна средина и просторно планирање и заменик претседател на Владата, е предложен Изет Меџити од коалицијата „Вреди“’, министер за здравство Арбен Таравари, министер за социјална политика, демографија и млади Фатмир Лимани, министер за економија Бесар Дурмиши. За министер без ресор и заменик претседател на владата задолжен за добро владеење е предложен Арбен Фетаи.
За министер за правда е предложен Игор Филков, додека за министер за јавна администрација Горан Минчев од Движењето ЗНАМ.