Секојдневно ги гледаме страотните снимки од Украина и трагичните судбини на луѓето на телевизиските екрани и на насловните страни, каде и да сте и низ какви и да се личните проблеми низ кои минувате, тие се врежуваат во вас, вели Кристофер Окиконе, фотограф на „Њујорк тајмс“, кој работи во Украина веќе десет години, во изминативе осум години и живее таму.
FotoEvidence и изложбата „Украина: Воено злосторство“ одат малку подлабоко, разоткривајќи ги мноштвото аспекти на воените злосторства, вклучувајќи повеќе од 360 фотографии и сведочења, кои фрлаат светло на руската инвазија, сведоштва за злосторство врз човештвото. Разрушени домови, разрушени семејства, убиства и тортура, слики кои ќе ве пратат сиот живот.
„Мислам дека за да разберете што се случува, при тоа свесен сум дека очигледно постојат и слепо проруски ставови и нив би им порачал да си го преиспитаат расудувањето. Доколку е личност која се обидува да најде нови одговори за се, меѓу кои се и оние со став Русија е виновна, но, кој и да биде посочен после тоа, но, САД, НАТО или Украина, што и да мислат дека го провоцирало сето ова, би ги поканил да ја погледнат изложбата и само едно прашање би им поставил Дали вредеше?“, изјава Кристофер Окиконе, фотограф на „Њујорк тајмс“.
Станува збор за фотодокази, вели Бачеванова кои се документација за кршење на човековите права.
„За мене е исклучително важно да се документира, користејќи ја фотографијата како средство кое сведочи за историјата. Во спротивно, имате ситуации во кои луѓето ќе речат нема фотографија, не се случило. Сеќавањата низ годините понекогаш стануваат кревки, затоа тука е фотографијата како сведоштво“, изјава Светлана Бачеванова, кураторка на изложбата и основач на FotoEvidence.
Во поставката, која ќе биде вечерва отворена во „Мала станица“, се опфатени 60-тина слики кои се дел од книгата „Украина: Воено злосторство“ која ја објави FotoEvidence и брои 360 фотографии на 93 храбри фоторепортери од целиот свет, кои ги ризикувале своите животи, нудејќи трогателен доказ за тековната борба.
Нина Стефанова