Секој десетти човек во земјата има проблеми со килограмите. Но, ако лекарите проценат, реалната слика е поинаква и таа бројка е трипати поголема. Обезноста го коси здравјето на граѓаните. Таа црна статистика е сѐ попристутна и кај децата и адолесцентите. Најтешкиот Македонец има 185 килограми. Од Здружението за обезност сметаат дека на оваа болест треба посериозно да ѝ пристапат и пациентите и докторите, затоа што предизвикува хронични болести заради кои се крати животниот век.
„Дебелината, односно обезноста, може да се превенира навремено со промена на стилот на животот, а особено со физичка активност и здрава исхрана“, изјави Ирфан Ахмети, претседател на Здружението за обезност.
Луѓето што живеат со дебелина се соочуваат и со дискриминација која влијае негативно врз нивната ментална и физичка благосостојба, а тоа ги спречува да побараат лекарска помош. Но, сепак, докторите велат дека пациентите сѐ повеќе се охрабруваат да побараат помош, а со тоа ги намалуваат компликациите кои можат да настанат. Дневно има повеќе од 30 прегледи.
„Многу тешко беше да се пробие стигмата на оваа болест да се прифати како хронична и прогресивна болест на која треба да се внимава целиот живот и да се лечи и затоа со отворање на нашиот прв центар во Македонија, на клиника имаме втор центар, а наскоро се подготвува за отворање третиот центар за деца и адолесценти. Матичните доктори навремено ги упатуваат тие што се обезни, со класа два и класа три и исто така пациентите кои имаат други коморбидитети“, изјави Танер Хасан, од Научното здружение за обезност.
Дебелината како хронична болест оди во пораст и во светски рамки. Осумстотини милиони луѓе ширум светот живеат со дебелина, а во иднина се очекува тој број да продолжи да расте, а повеќе од половина од нив да бидат деца.
Тамара Марковска