По синоќешните натпревари заврши групната фаза во фудбалската Лига на шампиони. Познати се сите тимови кои ќе продолжат во нокаут фазата и оние кои ќе играат во Лигата на Европа. Ждрепката за осминафиналните двојки е закажана за во понеденик.
Во најинтересната група Ф, или „групата на смртта“, Борусија Дортмунд го освои првото место со 11 бодови откако синоќа ремизираше 1-1 со ПСЖ. Понатаму одат и Французите иако завршија со ист број на бодови како Милан со по 8. „Росонерите“ победија со 2-1 на гостувањето кај Њукасл, но поради полошата гол-разлика и полошиот меѓусебен скор со ПСЖ, „светците“ ќе продолжат во осминафиналето, а „росонерите“ ќе се тешат со Лигата на Европа.
Од групата Е веќе беше познато дека Атлетико Мадрид и Лацио одат понатаму, па во нивниот меѓусебен дуел синоќа, Шпанците славеа со 2-0. Селтик запиша пирова победа од 2-1 против Феенорд, бидејќи холандскиот тим продолжи во Лигата на Европа.
Сити остана перфектен во групата Г, откако со мешан состав синоќа ја победи Црвена Ѕвезда со 3-2 во Белград, а Лајпциг го победи Јанг Бојс со 2-1. Швајцарскиот тим како третопласиран оди во второто по ранг натпреварување, а Ѕвезда остана последна со само еден бод.
Во групата Х, Порто обезбеди прогрес во осминафиналето со победата од 5-3 против Шахтер Доњецк, како второпласиран, а Барселона шокантно загуби од Антверп со 3-2, но остана на првото место.
Според пропозициите за ждрепката за осминафиналните двојки што ќе се одржи во понеделник, во осминафиналето не можат да се соочат екипи од иста земја и оние кои играле меѓусебе во групата. Носители се оние кои финишираа на првото место, додека неносители се второпласираните екипи од групите.
Елиминациите започнуваат на 13 и 14 февруари 2024 година, а големото финале е закажано за 1.јуни на стадионот „Вембли“ во Лондон.