Вработените во Министерството за финансии од следниот месец нема веќе да добиваат 30% повисока плата. Уставниот суд поведе постапка за член од Законот за буџети, со кој се регулира надополнувањето на платата кај вработените во Министерството за финансии и други органи. Судот се сомнева во уставноста на сегашното посебно правило, со кое вработените во овие институции добиваат 30% како надополнување на основната плата. За судот е нејаснен и неразбирлив поимот „надополнување на плата“. Вработените во овие институции со месеци добиваат 30% повисоки плати, а дали досегашните пари ќе ги враќаат Уставен допрва ќе одлучува.
„Судот цени дека со одредбата неосновано е уредено посебна група на вработени да добиваат определен износ изразен во проценти, врз основа на исплатата на специфични задачи и посебна одговорност. Тоа значи дека со оваа одредба се ставаат во повластена положба само вработените кои се опфатени со оспорениот член и автентичното толкување, наспорти сите други вработени кај буџетските корисници што е основ за сомнеж и во поглед на членот 9 став 2 од Уставот кои што определува дека сите граѓани се еднакви пред уставот и пред законите “, вели Христина Беловска портпаролка на Уставен суд.
Од финасии за Телма велат дека нема да ја коментираат оваа одлука на судот.
„Нема да коментираме судски одлуки и ќе ја чекаме конечната одлука на Уставниот суд за толкување на Законот за буџети од страна на Собранието на РС Македонија“, велат од Министерство за финансии.
Во меѓувреме, неизвесно е што ќе се случува со функционерските плати. Министерската Тренчевска е убедена дека до крајот на годинава ќе се најде решение за намалување на функционерските плати. И таа како и премиерот Ковачевски тврди дека тоа е сложен процес, но дека не е невозможно да се намалат примањата на функционерите кои, исто така со одлука на Уставниот суд, скокнаа за 78 отсто.
„Комплексно и тешко е меѓутоа не е невозможно и не се откажувам од тоа до крајот на годината да се најде решение за намалување на платите на функционерите“, вели Јована Тренчевска- министерска за труд и социјала.
Покрај Премиерот и министрите подлабоки паричници добија и Претседателот на државата, судиите, обвинителите, градоначалниците, директорите од државните и јавните претпријатија. Ваквата одлука ги разгневи сите останати категории на граѓани, особено вработените во јавниот сектор, но и пензионерите, кои измнатиот период изелгоа на блокади и бараа зголемување на нивните примања.
Симона Петровска