Несоодветна инфрастуктура, минимална вклученост во политичкиот живот – изборните процеси откриваат дека лицата со попреченост немаат еднакви права. Активистите сметаат дека треба да има квотна застапеност, но нивната вклученост треба да биде реална, за да можат да придонесат за подобрување на условите, зашто токму тие ги знаат потребите на оваа категорија граѓани.
- Се донесуваат закони без наше прашање, кога ќе се донесуваат такви закони, нарочито во Министерство за труд и социјална политика, треба да има наши претставници, да се знае што се носи“, вели Махмуд Изаири, кој е лице со попреченост
Според истражувањата на Здружението ИНКЛУЗИВА, кое организираше панел дискусија во Тетово, покрај минималното политичко учество, непристапноста до гласачките места го покажува и проблемот со кој овие лица секојдневно се соочуваат.
- 70% од гласачките места се непристапни, а тоа се училишта, знаеме сите дека се гласа во училиштата во државата и се запрашуваме како ќе се образуваат понатаму учениците со попреченост ако училиштата не се пристапни, лицата со попреченост не се вклучени во телата на политичките партии и ги нема на изборните листи, вели Благица Димитровска, претседател на Здружение за промоција и развој на инклузивно општество ИНКЛУЗИВА
На парламентарни избори само една партија предложила кандидат – лице со попреченост, но на дното на листа, додека на локалните имало 9, од кои две се претседатели на општински совети.
Данијела Билбилоска
