Еурофарм Пелистер се врати на врвот на македонскиот ракомет по долгогодишен пост без титула. Битолскиот тим ќе ја претставува Македонија во групната фаза во Лигата на шампиони следната сезона, а составот ќе изгледа доста поинаку, бидејќи седум играчи веќе се простија од зелениот дрес.
Синоќа клубот имаше завршна церемонија за одбележување на сезоната. Пелистер се прости со седум играчи кои беа дел од шампионскиот тим, кој ја врати тутлата во Битола за прв пат по 2005 година. Гоце Ојлески, Милорад Кукоски, Мартин Велковски, Себастијан Хенеберг, Мохамед Суси, Усама Хосни и Бојан Маџовски си заминуваат од Еурофарм Пелистер.
Ова значи дека ростерот ќе претрпи многу измени ова лето. На Пелистер ќе му требаат сериозни засилувања за да биде конкурентен во силната Лига на шампиони. За потсетување оваа сезона битолчани играат во Европската лига на ЕХФ, но воопшто не се прославија и не ја минаа групната фаза.
Добро е што македонскиот ракомет повторно се враќа во европската елита откако Вардар сезонава не доби дозвола за настап поради стари долгови кон поранешните играчи од претходното раководство.
Ви Битола очекувано ќе има работно лето, бидејќи треба да се создаде квалитетен тим, кој најпрво ќе треба да го брани тронот во домашното првенство од забревтаниот Алкалоид, но и од најтрофејниот Вардар, а потоа и остави добар впечаток во Лигата на шампиони.